State
- 2022 උසස් පෙළ ප්රතිඵල නියත වශයෙන්ම සැප්තැම්බර් 10 වනදාට පෙර.
- සා/පෙළ සහ උ/පෙළ විභාග ප්රතිඵල අපේක්ෂාවෙන් සිටින සිසුන්ට වෘත්තීය පුහුණුවක් – අධ්යාපන රාජ්ය අමාත්ය අරවින්ද කුමාර් මහතා.
ඉදිරියේ දී රජයේ පාසල් සඳහා ගුරුවරුන් අටදහසක් බඳවා ගැනීමට පියවර ගන්නා බව අධ්යාපන රාජ්ය අමාත්ය අරවින්ද කුමාර් මහතා පැවසීය.
මේ අනුව උපාධිධාරී ගුරුවරු 5500ක් සහ දෙවන භාෂා ගුරුවරුන් ලෙස ගුරුවරුන් 2500ක් බඳවා ගැනීමට නියමිත බව ද රාජ්ය අමාත්යවරයා සඳහන් කළේය.
අධ්යාපන රාජ්ය අමාත්ය අරවින්ද කුමාර් මහතා මෙම අදහස් පළ කර සිටියේ ‘ස්ථාවර රටකට සැවොම එක මඟකට’ මැයෙන් අද (23) ජනාධිපති මාධ්ය කේන්ද්රයේ පැවති ප්රවෘත්ති සාකච්ඡාවට එක්වෙමිනි.
එහිදී වැඩිදුරටත් අදහස් දැක්වූ අරවින්ද කුමාර් මහතා මෙසේ ද පැවසීය,
පසුගිය කාලයේ රට තුළ ආර්ථික අර්බුදයක් පැවතියත් අධ්යාපන අමාත්යාංශයේ කටයුතු පිළිබඳ රජය වැඩි අවධානයක් යොමු කර කටයුතු කළා. ඒ වගේම රටේ දරුවන්ගේ ඉදිරි අධ්යාපන කටයුතු නඟා සිටුවීම සම්බන්ධයෙන් ජනාධිපති රනිල් වික්රමසිංහ මහතා විසින් වැදගත් තීන්දු තීරණ රැසක් ගනු ලැබුවා.
රටේ දරුවන්ගේ අධ්යාපනය සහ එම ක්ෂේත්රයේ සිදුකළ යුතු ප්රතිසංස්කරණ පිළිබඳව එතුමා නිරන්තරයෙන් කතා කරනවා. ඒ අනුව අධ්යාපන ක්ෂේත්රයේ නව ප්රතිසංස්කරණ රැසක් සමඟ එම කටයුතු ඉදිරියට ගෙන යාමට අමාත්යාංශය සැලසුම්සහගතව කටයුතු කරනවා.
නව විෂය මාලාවලින් සමන්විත එම අධ්යාපන ප්රතිසංස්කරණමය වැඩසටහන අධ්යාපන අමාත්යවරයාගේ මඟපෙන්වීමෙන් දැනටමත් ක්රියාත්මකයි. ස්ටීම් (STEAM) අධ්යාපන ක්රමය මේ වන විට ලෝකයේ රටවල ඉතා සාර්ථකව ක්රියාත්මක වන අධ්යාපන ක්රමයක්. එම සංකල්පය අපේ රටේ ද ක්රියාත්මක කිරීමට රජයේ අවධානය යොමුව තිබෙනවා.
ඒ වගේම දරුවන් තාක්ෂණ දැනුමෙන් සන්නද්ධ කිරීමට මෙන්ම නව තාක්ෂණික ක්රම ඔස්සේ අධ්යාපන කටයුතු පවත්වාගෙන යාමට අවශ්ය සැලසුම් සකස් කර තිබෙන බව කිව යුතුයි.
සාමාන්ය පෙළ හා උසස් පෙළ විභාග ප්රතිඵල ලැබෙන තෙක් නිවෙස්වලට වී සිටින දරුවන්ට වෘත්තීය, තාක්ෂණික මෙන්ම ඉංග්රීසි ඇතුළු භාෂා පුහුණුවක් ලබාදීමට අධ්යාපන අමාත්යාංශය තීරණය කර තිබෙනවා.මේ සඳහා දිවයිනේ පාසල් 320ක් දැනටමත් තෝරාගෙන තිබෙනවා. එම වෘත්තීය පුහුණු වැඩසටහන ලබන වසරේ ජනවාරි මාසයේ සිට ආරම්භ කිරීමට නියමිතයි.
පාසල් සඳහා ගුරුවරුන් 8000ක් අප දැනටමත් බඳවා ගෙන තිබෙනවා. ඉදිරියේදී තවත් උපාධිධාරීන් 5500ක් ගුරුවරුන් ලෙස පුහුණු කර බඳවා ගැනීමට කටයුතු කරනවා. ඊට අමතරව දෙවන භාෂා ගුරුවරුන් ලෙස තවත් 2500ක් බඳවා ගැනීමට නියමිතව තිබෙනවා.
වෘත්තීය පුහුණු වැඩසටහන පසුගිය කාලයේ පැවති කොවිඩ් වසංගත තත්ත්වය නිසා අඩපණ වුණා.
නමුත් මේ වන විට සුපුරුදු ලෙස දිවයින පුරා පිහිටි සියලුම වෘත්තීය පුහුණු මධ්යස්ථාන සිය කටයුතු ආරම්භ කර තිබෙනවා.
ඒ වගේම 2022 උසස් පෙළ විභාගයේ ප්රතිඵල ලබන සැප්තැම්බර් මස 10 වැනිදාට පෙර අනිවාර්යෙන්ම නිකුත් කිරීමට අවශ්ය පියවර ගෙන තිබෙනවා.
එසේම රටේ සියලු ප්රදේශවල දරුවන් අද අධ්යාපනයේ දී විශිෂ්ට දක්ෂතා පෙන්නුම් කරනවා. ඒ වගේම විශාල සිසුන් පිරිසක් විශ්වවිද්යාල සුදුසුකම් ලබනවා. රටේ අධ්යාපනය අද ඉහළ ගුණාත්මකභාවයකින් පවතින බව ඒ අනුව පෙනී යනවා.
- ඊට දායකවන සියලු දෙනාට පහසුකම් සැලසීමට රජය සුදානම් – “හිල්ටන් යාල රිසෝර්ට්” අති සුඛෝපභෝගී හෝටලය විවෘත කරමින් ජනපති පවසයි.
මෙරට ආර්ථිකය ගොඩනැඟීමේ ඉලක්ක කඩිනමින් සපුරා ගත හැකි ප්රමුඛ ක්ෂේත්රය සංචාරක කර්මාන්තය බවත් වැදගත් තීන්දු තීරණ රැසක් ගනිමින් එහි ප්රවර්ධනය වෙනුවෙන් රජය ප්රමුඛ අවධානයක් යොමු කර තිබෙන බවත් ජනාධිපති රනිල් වික්රමසිංහ මහතා පැවසීය.
අංශ කිහිපයක අත්යාවශ්ය සේවා ප්රකාශයට පත් කිරීම දීර්ඝ කරමින් ජනාධිපති රනිල් වික්රමසිංහ අතිවිශේෂ ගැසට් නිවේදනයක් නිකුත් කර තිබේ.
චීන ජාතික ආරක්ෂක අමාත්යාංශයෙන් ඇමරිකානු ඩොලර් මිලියන 6.2 ක් වටිනා ‘හදිසි විධාන සහ සන්නිවේදන පද්ධති වාහන රථ පෙළ’ (මෝටර් රථ 11) ඊයේ (22) ආරක්ෂක රාජ්ය අමාත්ය ප්රමිත බණ්ඩාර තෙන්නකෝන් මහතා විසින් යුධ හමුදා මූලස්ථාන පරිශ්රයේදී නිල වශයෙන් භාරගන්නා ලදි.
තරුණ ප්රජාවට පළාත් පාලන ආයතනවල 25%ක නියෝජනය තහවුරු කිරීම සඳහා වූ පනත් කෙටුම්පත පාර්ලිමේන්තුවට ඉදිරිපත් කරන බව පාර්ලිමේන්තු මන්ත්රී ප්රේමනාත් සී. දොලවත්ත මහතා පැවසීය.
- අතීතය ගැන පමණක් සිතන දේශපාලන සම්ප්රදායෙන් බැහැරව අනාගතය පිළිබඳ අවධානය යොමු කරමින් ඉදිරියට යා යුතුයි – ජනපති නුගේගොඩ අනුලා විද්යාලයේ වාර්ෂික ත්යාග ප්රදානෝත්සවයේ දී කියයි.
ඉදිරි ගෝලීය අභියෝගවලට මුහුණදිය හැකි හා නවීන තාක්ෂණය සමඟ අනුගත වූ අධ්යාපන ක්රමයක් රටට හඳුන්වා දෙන බව ජනාධිපති රනිල් වික්රමසිංහ මහතා පැවසීය.
රටේ මේ අවස්ථාවේ පවතින පානීය ජල අවශ්යතාවය හදිසි තත්ත්වයක් ලෙස සලකා, ජල සම්පාදන, වාරිමාර්ග, රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්යංශ එකාබද්ධව කඩිනම් වැඩපිළිවෙළක් හදිසි ක්රියාකාරී කමිටුවක් හරහා ක්රියාත්මක කිරීමට, අග්රාමාත්ය දිනේෂ් ගුණවර්ධන මහතාගේ ප්රධානත්වයෙන් පාර්ලිමේන්තු සංකීර්ණයේදී අද (22)පැවති විශේෂ රැස්වීමකදී තීරණය විය.
ගොවීන්ගෙන් වී මිලදී ගැනීමේදී මතුව ඇති ගැටලු විසඳීමට කඩිනමින් පියවර ගන්නා බව කෘෂිකර්ම අමාත්ය මහින්ද අමරවීර මහතා පැවසීය.
- ශ්රී ලංකාවේ තේ නොකිළිටි තේ ලෙස ජාත්යන්තරයට ගෙන යන ඉලක්කය සාර්ථක කර ගන්න – ජනපති කොළඹ තේ වෙළෙඳුන්ගේ සංගමයේ වාර්ෂික මහා සම්මේලනයේ දී පවසයි.
තේ ඇතුළු මෙරට වැවිලි කර්මාන්තය ඉදිරියට ගෙන යාමට නව වැඩපිළිවෙළක් අවශ්ය බවත් එය නූතන ඩිජිටල් තාක්ෂණික ක්රමවේද කැටි වූ විශිෂ්ට නිර්මාණයක් විය යුතු බවත් ජනාධිපති රනිල් වික්රමසිංහ මහතා පැවසීය.
ලබන මහ කන්නයේ සිට වී වගාව සඳහා යුරියා පොහොර ලබා දෙන මිලටම එළවළු ගොවීන්ටත් යුරියා පොහොර ලබා දීමට තීරණය කර තිබෙන බව කෘෂිකර්ම අමාත්ය මහින්ද අමරවීර මහතා පැවසීය.
ඊයේ (21) පස්වරුවේ ආර්ථික මධ්යස්ථානවල පාලකයින් හා ගොවි නියෝජිතයින් සමග පැවැති සාකච්ඡාවක දී අමාත්යවරයා මේ බව සඳහන් කළේය.
දැනට වෙළෙඳපොළේ ඇතැම් එළවළු මිල ගණන් ඉහළයාම සම්බන්ධව අදහස් පළ කරමින් ගොවි නියෝජිතයින් කියා සිටියේ පවතින නියඟය නිසා මෙන්ම පොහොර මිළ ගණන් ඉහළ මට්ටමක පවතින නිසා එළවළු වගා කරන ගොවීන් මහත් අසීරුතාවන්ට ලක්ව ඇති බවයි.
එමනිසා වී වගාවට මෙන්ම එළවළු වගාවට ද යුරියා පොහොර සහන මිලකට ලබා දීම සඳහා පියවර ගන්නා ලෙස ඔවුන් අමාත්යවරයාගෙන් ඉල්ලීමක් කළේය.
ඊට පිළිතුරු දුන් අමාත්ය මහින්ද අමරවීර මහතා නුවරඑළිය, බදුල්ල, දඹුල්ල, ආදි ප්රදේශ ගණනාවක ගොවීන් සමග කළ සාකච්ඡාවල දී එළවළු වගාව සඳහා සහන මිලකට යුරියා පොහොර ලබා දෙන ලෙස ගොවි ජනතාව ඉල්ලීම් ඉදිරිපත් කළ බවත්, එමනිසා ලබන මහ කන්නයේ සිට එළවළු ගොවීන්ට වී වගාව සඳහා යුරියා පොහොර ලබා දෙන මිල ගණන්වලටම යුරියා පොහොර ලබා දීමට පියවර ගන්නා බව සඳහන් කළේය.
එමෙන්ම ලංකා පොහොර සංස්ථාව හා කොමර්ෂල් පොහොර සමාගම විසින් එළවළු හා අනිකුත් වගාවන් සදහා මිශ්රණ පොහොර සකස් කරන අතර එම පොහොර ද වෙළෙඳ පොළේ මිලට වඩා අඩු මිලට ලබා දීමට කටයුතු යොදා ඇති බවද සඳහන් කළේය.
මීට අමතරව ආර්ථික මධ්යස්ථානවල තත්ත්වය ගැන සඳහන් කළ අමාත්යවරයා ආර්ථික මධ්යස්ථාන පිහිටුවන විට අපේක්ෂිත පර්මාර්ථය මේ වනවිට ඉක්මවා ගොස් ඇති බව සඳහන් කළේය.
ආර්ථික මධ්යස්ථාන පිහිටුවන ලද්දේ යහපත් චේතනාවකින්. විශේෂයෙන් ගොවියාත් පාරිභෝගිකයාත් දෙදෙනාම ආරක්ෂා කිරීමේ අරමුණින්. නමුත් මේ වනවිට ආර්ථික මධ්යස්ථාන පාලනය කරන්නේ හා ඉන් ලාබ ලබන්නේ නාඩි කාරයින් ලෙස හඳුන්වන වෙනත් අතරමැදි පිරිසක්. මෙම තත්ත්වය නැති කළ යුතු යැයි ද කීය.
ආර්ථික මධ්යස්ථානවල කටයුතු විදිමත් කිරීම හා සොයා බැලිම සඳහා අමාත්යවරයා විසින් කමිටුවක් පත් කළේය. ඒ අනුව ඒ සඳහා පත් කරන කමිටුව විසින් මාස දෙකක් තුළ ආර්ථික මධ්යස්ථානවල පවතින තත්ත්වය පිළිබඳ වාර්තාවක් ලබා දෙන ලෙසත්, එම වාර්තාව අනුව ආර්ථික මධ්යස්ථානවල කළ යුතු වෙනස්කම් සම්බන්ධව පියවර ගන්නා බවත් සඳහන් කළේය.
ඉදිරියේ දී වාර්ෂිකව සංචාරකයන් මිලියන 05ක් මෙරටට ගෙන්වා ගැනීමේ ඉලක්කය සපුරා ගැනීමේ වැඩපිළිවෙළ කඩිනම් කරන ලෙස ජනාධිපති රනිල් වික්රමසිංහ මහතා අදාළ නිලධාරීන්ට උපදෙස් දුන්නේය.
2030 වනවිට මෙරට සමස්ත විදුලිබල උත්පාදන අවශ්යතාවයෙන් 70% පුනර්ජනනීය බලශක්තින් මගින් සපුරාගැනීමේ රජයේ වැඩපිළිවෙළට නැගෙනහිර පළාත සූදානම් කිරීම සඳහා සහ නව ඉන්ධන පිරිපහදුවක් සමඟ නිර්මාණය වන ත්රිකුණාමලය සංවර්ධන සැලසුම පිලිබදව විශේෂ සාකච්ඡාවක් අමාත්යාංශ ශ්රවණාගාරයේ දී පැවැත්විණි.
රජයට අයත් ලංකා පොහොර සමාගම විසින් මඩ පොහොර සහ බණ්ඩි පොහොර නව මිශ්රණ පොහොර දෙකක් හඳුන්වා දීම අද (21) වත්තල, හුණුපිටිය ලංකා පොහොර සමාගම් පරිශ්රයේ දී සිදු කෙරිණි.
පළාත් පාලන කටයුතුවලට සම්බන්ධවීමට පාර්ලිමේන්තු මන්ත්රීවරුන්ට ද අවස්ථාව – ජනපති.
ප්රාදේශීය සභාව, පළාත් සභාව හා මධ්යම රජය යන අංශ තුනෙන්ම සේවාවන් සැපයීමේ දී සිදුවන මුදල් නාස්තිය වළක්වා ගැනීම සඳහා මෙම යාන්ත්රණ තුනෙහිම ක්රියාකාරිත්වය පිළිබඳ අවධානය යොමු කරමින් නව යාන්ත්රණයක් සැකසීමට කටයුතු කරන බව ජනාධිපති රනිල් වික්රමසිංහ මහතා පැවසීය.
ජනාධිපති රනිල් වික්රමසිංහ මහතා සිංගප්පූරුවේ දෙදින නිල සංචාරයක් සඳහා හෙට (21) අලුයම දිවයිනෙන් පිටත්ව යාමට නියමිතය.
ලංකා විදුලිබල මණ්ඩලය විසින් ටෙන්ඩර් කැඳවන ලද සියඹලාණ්ඩුව මෙගාවොට් 100ක බිම්ගත සූර්ය පැනල මගින් විදුලි උත්පාදනය කිරීමේ ව්යාපෘතියේ කොන්ත්රාත්තුව පිරිනැමීම පසුගියදා (16) සිදු කෙරිණි.
කුරුඳු සංවර්ධනය සඳහා නව දෙපාර්තමේන්තුවක් ස්ථාපිත කිරීමට රජය තීරණය කර ඇති අතර ඒ සඳහා කැබිනට් අනුමැතිය ලැබී තිබේ.
Page 68 of 647