නිසි ව්‍යාපාරික සැලැස්මකින් තොරව ඉදි කර ඇති මත්තල ජාත්‍යන්තර ගුවන්තොටුපොළ හේතුවෙන් ඩොලර් මිලයන 260 ක පමණ ණය මුදලක් ගෙවීමට ඉතිරිව ඇති නමුත් පියවරෙන් පියවර මෙම ජාත්‍යන්තර ගුවන්තොටුපොළ දියුණු කිරීමට බලාපොරොත්තු වන බව ප්‍රවාහන, මහාමාර්ග , වරාය හා සිවිල්ගුවන්සේවා අමාත්‍ය බිමල් රත්නායක මහතා පවසයි.
මෙහෙයුම් කටයුතු නිසි ලෙස සිදු නොවීම හේතුවෙන් දැඩි ආර්ථික පරිහානියකට ලක්ව තිබෙන අමතර ගුවන්තොටුපොළක් තිබීම වටිනා බව ද මගී ප්‍රවාහනය යථා තත්වයට පත්කිරීමට කාලයක් ගත වුව ද වෙනත් ව්‍යාපාරික අවස්ථා සහ උපක්‍රම උපයෝගී කර ගනිමින් මෙම ගුවන්තොටුපොළ ක්‍රමයෙන් දියුණු කිරීමට බලාපොරොත්තු වන බවද අමාත්‍යවරයා පැවසීය.
අමාත්‍යවරයා මේ බව පැවසුවේ ඊයේ(10) මත්තල ජාත්‍යන්තර ගුවන්තොටුපොළෙ හි විශේෂ නිරීක්ෂණයකට සහභාගි වෙමිනි.
මත්තල ජාත්‍යන්තර ගුවන්තොටුපොළ වන සතුන් බහුල ප්‍රදේශයක ඉදිකර ඇති අතර ගුවන්තොටුපොළ ආශ්‍රිත කලාපයේ වන සතුන් බහුල වීමෙන් මෙහෙයුම් කටයුතු වලට බධාවක් ඇති විය හැකි බැවින් ත්‍රිවිධ හමුදාවේ උදව් ඇති ව මේ වන විට ගුවන්තොටුපොළ ආශ්‍රිත පරිසරය 70% ක් පමණ එළිපෙහෙලි කර ඇති අතර ඉතිරි ප්‍රදේශය ද ඉක්මණින් එළිපෙහෙලි කර අවසන් කිරීමට බලාපොරොත්තු වේ. ඉදිරියේ දී පැමිණිය හැකි වන සතුන්ගේ බලපෑම් අවම කර ගැනිම සඳහා වනජීවී නිලධාරීන් කිහිපදෙනෙකු සහ සිවිල් ආරක්ෂක නිලධාරීන් කිහිපදෙනෙකු යෙදවීමට බලාපොරොත්තු වන බව ද අමාත්‍ය බිමල් රත්නායක මහතා පැවසී ය.
මත්තල ගුවන්තොටුපොළ තුළ ගුවන්ගමන් සඳහා සුදුසු පරිසරයක් නිර්මාණය කර ඇති අතර ශ්‍රී ලංකා ගුවන් සමාගම හදිසි ගොඩ බැස්සවිම් සඳහා භාවිතා කරන අමතර ගුවන්තොටුපොලක් ලෙස මත්තල ගුවන්තොටුපොල භාවිතා කිරීමට කැමැත්ත පළ කර ඇති බව ද අමාත්‍ය බිමල් රත්නායක මහතා පැවසීය. තවදුරටත් අදහස් දැක් වු අමාත්‍යවරයා පවසා සිටියේ එමඟින් අනෙකුත් ගුවන් සමාගම් වලට ද සුභවාදී පණිවිඩයක් යනු ඇතැයි අපේක්ෂා කරන බවයි.