ද්විපාර්ශ්වික ගුවන් සේවා සබඳතාවල සැලකිය යුතු සන්ධිස්ථානයක් සනිටුහන් කරමින්, ශ්‍රී ලංකාවට ක්‍රියාත්මක වන පැරණිතම ජාත්‍යන්තර ගුවන් සේවයක් වන කුවේට් එයාර්වේස්, ශ්‍රී ලංකන් ගුවන් සේවය සමඟ වසර දෙකක සාර්ථක කේත හුවමාරු මෙහෙයුම් වලින් පසු කොළඹට සෘජු මාර්ගගත මෙහෙයුම් නිල වශයෙන් නැවත ආරම්භ කරනු ලැබීය.
1978 ඔක්තෝබර් 15 වන දින ශ්‍රී ලංකාවට ප්‍රථම වරට සේවා ආරම්භ කළ කුවේට් රාජ්‍යයේ ජාතික ගුවන් සේවය, දැන් එහි අති නවීන එයාර් බස් A320neo ගුවන් යානය භාවිත කරමින් සතිපතා ගුවන් ගමන් හතරක් නැවත ආරම්භ කරන අතර එමගින් මගීන්ට වැඩි සුවපහසුවක් සහ බාධාවකින් තොරව සම්බන්ධතාවක් ලබා දෙයි.
මංගල ගුවන් ගමන් පිළිගැනීමේ උත්සවය අද (27) බණ්ඩාරනායක ජාත්‍යන්තර ගුවන්තොටුපළේ දී (BIA) පැවැත්විණ.
එහි දී ගුවන්තොටුපළ සහ ගුවන් සේවා (ශ්‍රී ලංකා) (පුද්ගලික) සමාගම විසින් ජල ආචාරයක් පිරිනමන ලද අතර, පසුව ශ්‍රී ලංකා සංචාරක ව්‍යාපාරය විසින් උඩරට නර්තන ප්‍රසංගයක් පවත්වන ලදී.
ඊට අමතරව, ශ්‍රී ලංකා තේ මණ්ඩලය විසින් පිරිනමන ලද සිලෝන් තේ තෑගි සමඟ මගීන් උණුසුම් ලෙස පිළිගනු ලැබීය.
කුවේට් එයාර්වේස් සහ ශ්‍රී ලංකාවේ ගුවන් සේවා කර්මාන්තය අතර දිගුකාලීන හවුල්කාරිත්වයේ නව පරිච්ඡේදයක් සංකේතවත් කරමින් සිහිවටන හුවමාරුවකින් උත්සවය අවසන් විය.