සමාජය සවිබල ගැන්වීම සහ ආර්ථික ප්රතිලාභ සමාජය තුළ සාධාරණව බෙදී යාම සහතික කිරීම සඳහා වත්මන් රජය විසින් ක්රියාත්මක කරනු ලබන “ප්රජාශක්ති” ජාතික වැඩසටහනේ මෙහෙයුම් කමිටුවේ තෙවැනි රැස්වීම ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්ය උපාලි පන්නිලගේ මහතාගේ ප්රධානත්වයෙන් සෘජු සහ මාර්ගගත යන ද්විතීක ක්රමය ඔස්සේ ජනාධිපති ලේකම් කාර්යාලයේදී ඊයේ (06) පස්වරුවේ පැවැත්විණි.
ප්රජාශක්ති ජාතික ව්යාපාරය ක්රියාත්මක කිරීම සම්බන්ධයෙන් නිකුත් කරන ලද සංශෝධිත චක්රලේඛයට මෙහෙයුම් කමිටුවේ අනුමැතිය ලබා ගැනීම සහ ප්රජාශක්ති දිළිදුබව තුරන් කිරීමේ ජාතික ව්යාපාරය ක්රියාත්මක කිරීම සඳහා මෙහෙයුම් උපදෙස් සහ මාර්ගෝපදේශ කෙටුම්පත සම්බන්ධවද මෙහිදී සාකච්ඡා විය.
ප්රජාශක්ති වැඩසටහනට අදාළව රාජ්ය නිලධාරීන් සඳහා වූ පුහුණු වැඩසටහන ක්රියාත්මක කිරීම සහ එහි සැලැස්ම මෙන්ම, ප්රජා සංවර්ධන සභා පිහිටුවීම සම්බන්ධවද මෙහිදී දීර්ඝ ලෙස සාකච්ඡා කෙරිණි.
ප්රජාශක්ති සන්නිවේදන හා ප්රවර්ධන සැලැස්ම පිළිබඳව මෙහිදී සාකච්ඡා කෙරුණු අතර, ප්රජාශක්ති වැඩසටහන රට තුළ ක්රියාත්මක වීම සහ සන්නිවේදන ප්රවර්ධන කාර්යයයන් මනා ඒකාබද්ධතාවකින් ක්රියාත්මක විය යුතු බව එහිදී අවධාරණය විය. ඒ සඳහා සකස් කරන ලද පස් වැදෑරුම් ප්රවේශයකින් යුත් සන්නිවේදන ප්රවර්ධන සැලැස්ම සඳහා ප්රජා ශක්ති මෙහෙයුම් කමිටුවේ අනුමැතිය ලබා දීමද මෙහිදී සිදු විය.
ප්රජා ශක්ති ජාතික ව්යාපාරය ක්රියාත්මක කිරීම සඳහා අවශ්ය කාර්යමණ්ඩල අනුයුක්ත කර ගැනීම සහ සෑම ග්රාම නිලධාරී කොට්ඨාසයකටම සවිබල ගැන්වීමේ නිලධාරියකු පත් කර ගැනීමටත්, දැනට රාජ්ය සේවයේ නියුතු සංවර්ධන නිලධාරින් ග්රාමීය සංවර්ධන, සමාජ ආරක්ෂණ, ප්රජා සවිබල ගැන්වීමේ අමාත්යාංශයට අනුයුක්ත කර ගැනීමටත් මෙහිදී අවධානය යොමු විය.
2027 වර්ෂය සඳහා වන සංවර්ධන යෝජනා සෘජුව අදාළ අමාත්යාංශ, පළාත් සභා සහ අනෙකුත් ආයතන වෙත යොමු කිරීමට අනුමැතිය ලබා ගැනීම, විවිධ අමාත්යාංශ සහ පළාත් සභා විසින් ක්රියාත්මක කරනු ලබන ව්යාපෘති අධීක්ෂණය සඳහා ප්රජා සංවර්ධන සභාවේ සහාය ලබා ගැනීම, 2026 ප්රජාශක්ති වාර්ෂික සැලැස්ම සඳහා මෙහෙයුම් කමිටු අනුමැතිය ලබා ගැනීම ඇතුළු ප්රජාශක්ති ව්යාපාරය සම්බන්ධයෙන් වැදගත් කරුණු රැසක් පිළිබඳව සාකච්ඡා කිරීම සහ ඊට අනුමැතිය ලබා ගැනීමද මෙහිදී සිදු කෙරිණි.
ජනාධිපති ලේකම් ආචාර්ය නන්දික සනත් කුමානායක, ප්රජාශක්ති මෙහෙයුම් කමිටුවේ කැඳවුම්කරු හා ලේකම් ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීම් අමාත්යාංශයේ ලේකම් සම්පත් මන්ත්රීනායක, රාජ්ය පරිපාලන, පළාත් සභා සහ පළාත් පාලන අමාත්යාංශයේ ලේකම් එස්. ආලෝක බණ්ඩාර, නිවාස, ඉදිකිරීම් හා ජලසම්පාදන අමාත්යාංශයේ ලේකම් ඉංජිනේරු එල්. බී. කුමුදු ලාල්, කම්කරු අමාත්යාංශයේ ලේකම් එස්. එම්. පියතිස්ස, ප්රවාහන, මහාමාර්ග හා නාගරික සංවර්ධන අමාත්යාංශයේ ලේකම් ජ්යෙෂ්ඨ මහාචාර්ය කපිල පෙරේරා, වැවිලි සහ ප්රජා යටිතල පහසුකම් අමාත්යාංශයේ ලේකම් ගුණදාස සමරසිංහ, කාන්තා හා ළමා කටයුතු අමාත්යාංශයේ ලේකම් ඩබ්.එම්.ඩී.ටී. වික්රමසිංහ, යන මහත්වරු ඇතුළු, ප්රජාශක්ති මෙහෙයුම් කමිටු සාමාජිකයන් මෙම අවස්ථාවට සහභාගි වූ අතර, එහි සාමාජිකයන් වන පළාත් සභා ලේකම්වරුන් මාර්ගගත ක්රමය ඔස්සේ මෙම අවස්ථාවට සම්බන්ධ වූහ.