රජයේ අපේක්ෂිත අධ්යාපන පරිවර්තන ඉලක්කයන් සාක්ෂාත් කර ගැනීමට හැකියාවකින් සහ නායකත්ව ගුණාංගයන්ගෙන් යුත් ගුරුවරුන් බිහි කරන පරිසරයක් ජාතික අධ්යාපන විද්යාපීඨ තුළ ගොඩනැගිය යුතු බව අධ්යාපන, උසස් අධ්යාපන හා වෘත්තීය අධ්යාපන අමාත්ය, අග්රාමාත්ය ආචාර්ය හරිනි අමරසූරිය ප්රකාශ කර සිටියාය.
ජාතික අධ්යාපන විද්යාපීඨ ප්රමිතිය නගාසිටුවීම සඳහා පත්කළ නව විද්වත් කමිටුවේ සාමාජිකයින් සමග 2026.04.02 දින ඉසුරුපාය, අධ්යාපන අමාත්යාංශ පරිශ්රයේදී පැවති සාකච්ඡාවකදී අග්රාමාත්යවරිය මේ බව ප්රකාශ කළාය.
පේරාදෙණිය විශ්වවිද්යාලයේ සිංහල අධ්යයන අංශයේ මහාචාර්ය ලියනගේ අමරකීර්ති මහතාගේ සභාපතිත්වයෙන් රැස්වෙන මෙම කමිටුව, කොළඹ විශ්වවිද්යාලයේ මානව සම්පත් කළමනාකරණ අධ්යයන අංශයේ ජ්යෙෂ්ඨ මහාචාර්ය අරෝෂා අදිකාරම් මහත්මියගේ සහ යාපනය විශ්වවිද්යාලයේ රසායන විද්යා අධ්යයන අංශයේ මහාචාර්ය පූබාලසුන්දරම් අයින්ගරන්, ශ්රී ලංකා ගුරු අධ්යාපනඥ සේවයේ විශ්රාමික ජ්යෙෂ්ඨ කථිකාචාර්ය පී.ඒ.ඩී. අනිල් යන මහතුන්ගේ සාමාජිකත්වයෙන් යුක්තය.
රජයේ ජාතික ප්රතිපත්ති ප්රකාශනයේ අධ්යාපන ප්රතිපත්තියට අනුකූලව ජාතික අධ්යාපන විද්යාපීඨයන්හි සමස්ත ආයතනික ව්යුහය ආවරණය වන පරිදි යටිතල පහසුකම් ඇතුළු සිසු සුබසාධනය වර්ධනය කරමින් එහි පාලන කටයුතු, තිරසාරභාවය, ඉගෙනුම් පරිසරය හා ඇගයීම් ක්රමවේදය, ආචාර්යවරුන් සහ සිසුන් අතර පවත්නා අන්තර් සම්බන්ධතාවය වැනි සාධක වැඩිදියුණු කරලීම සඳහා අවශ්ය ක්රියාමාර්ග නිර්දේශ කිරීම මෙම කමිටුව මගින් සිදු කිරීමට නියමිතය.
මෙහිදී අදහස් දැක්වූ අග්රාමාත්යවරිය කියා සිටියේ පාසල් ප්රාථමික හා ද්විතීක අධ්යාපනය ගුණාත්මකව පවත්වාගෙන යාමට අවශ්ය ගුරුවරුන් බිහි කරමින් ජාතික අධ්යාපන විද්යාපීඨ අතිශය වැදගත් මෙහෙවරක් ඉටු කරන බවයි. එබැවින් ඉහළ පෙළේ ගුරුවරුන් බිහි කරන ස්ථානයක් බවට එම ආයතනයන් අනාගතයේදී පත් කිරීම සඳහා විද්යාපීඨයන්හි සමස්ත ආයතනික ව්යුහය ආවරණය වන පරිදි පුළුල් අධීක්ෂණ ක්රියාවලියක් මෙම පත් කරන ලද කමිටුව විසින් සිදු කළ යුතු බවද ඇය පෙන්වා දුන්නාය.
තවද මේ සඳහා අවබෝධයක් ලබා ගැනීම සඳහා කමිටු සාමාජිකයින් විසින් සියලු ජාතික අධ්යාපන විද්යාපීඨයන් නිරීක්ෂණය කළ යුතු බව කී අග්රාමාත්යවරිය, එම නිරීක්ෂණ කටයුතු සාර්ථකව කරගෙන යාම සඳහා අවශ්ය මාර්ගෝපදේශයන් ලබා දීම ද සිදු කළාය.
මේ සඳහා අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ ලේකම් නාලක කලුවැව මහතා ඇතුළු අධ්යාපන අමාත්යාංශ නිලධාරිහූ සහභාගී වූහ.