මෑතදී ඇති වූ ගංවතුර තත්ත්වය හේතුවෙන් ධීවර ක්ෂේත්රයට සිදු වූ හානියේ මූලික ඇස්තමේන්තුව රුපියල් මිලියන 7,649 ඉක්මවා ඇති බව ධීවර අමාත්යාංශය ඊයේ (23) නිවේදනය කළේය.
ඊට ප්රතිචාර වශයෙන්, ධීවර, ජලජ හා සාගර සම්පත් අමාත්ය, රාමලිංගම් චන්ද්රසේකර් මහතා, කර්මාන්තය යළි ගොඩනැගීම සඳහා ක්ෂණික සහන සහ දීර්ඝකාලීන සහයෝගය ලබා දීමේ පුළුල් ප්රතිසාධන සැලැස්මක් තිබෙන බව පැවසීය.
ප්රධාන විදේශ විනිමය උත්පාදන මාර්ගයක් වන ජලජීවී වගා ක්ෂේත්රයට රුපියල් මිලියන 5,850ක විශාල හානියක් සිදුව ඇති බවත් එයින් ප්රධාන වශයෙන් විසිතුරු මසුන්, ඉස්සන් සහ මුහුදු කූඩැල්ලන් කර්මාන්තවලට බලපෑම් එල්ල වී ඇති බවත් මෙහිදී සාකච්ඡාවට ලක් විය.
කරදිය ධීවර ක්ෂේත්රයේ අලාභය රුපියල් මිලියන 1,799ක් ලෙස ඇස්තමේන්තු කර තිබේ.
ජනාධිපතිවරයා සමඟ පැවති සාකච්ඡාවෙන් පසු පහත සඳහන් පුළුල් ප්රතිසාධන සැලැස්ම ප්රකාශයට පත් කර තිබෙන බව ද අමාත්යවරයා පෙන්වා දුන්නේය.
යාත්රා ප්රතිස්ථාපනය සහ අලුත්වැඩියාව:
සම්පූර්ණයෙන්ම විනාශ වූ බහුදින සහ එක්දින (I-Day) යාත්රා 13 සඳහා, ඔවුන්ට හිමි රක්ෂණ වන්දියට අමතරව, රජය විසින් හඳුන්වා දී ඇති අඩු පොලී ණය යෝජනා ක්රම වෙත යොමු කර, තමන් කැමති ස්ථානයකින් නව යාත්රාවක් ඉදිකර ගැනීමට අවස්ථාව සලසා දෙනු ලැබේ.
අනෙකුත්, සම්පූර්ණයෙන්ම විනාශ වූ සියලුම කරදිය යාත්රා සඳහා, රක්ෂණ වන්දි මුදල සී-නෝර් ආයතනය වෙත යොමු කිරීමෙන් පසු, එම ආයතනය මගින් නව යාත්රාවක් ලබා දීමට කටයුතු යොදා ඇත.
අර්ධ වශයෙන් හානි වූ සියලුම යාත්රා (කරදිය සහ මිරිදිය), එම ස්ථානවලදීම සී-නෝර් ආයතනය මගින් රජයේ වියදමින් නොමිලේ අලුත්වැඩියා කිරීමට පියවර ගෙන ඇත.
ධීවර ආම්පන්න සඳහා සහාය: දැල් විනාශ වූ කරදිය ධීවරයින් 1,205 දෙනෙකු සඳහා රුපියල් ලක්ෂයක් දක්වා වටිනා වවුචරයක් ද, මිරිදිය ධීවරයින් 6,000කට ආසන්න පිරිසක් සඳහා රුපියල් 75,000ක් දක්වා වටිනා ආධාරයක් ද ලබා දීමට නියමිතය.
ජලජීවී වගාවට අත්වැලක්: කුඩා පරිමාණ ඉස්සන් ගොවීන්ට පළමු කන්නය සඳහා අවශ්ය පසු-කීටයින් (PLs) නොමිලේ ලබා දේ. හානියට පත් වැව් 699ක මත්ස්ය ගහනය, වාර දෙකක් දක්වා නැවත ස්ථාපිත කිරීමටත්, විසිතුරු මසුන් නිෂ්පාදකයින්ට නව මව් සතුන් ලබා දීමටත් නැක්ඩා ආයතනය කටයුතු කරයි.
මූල්ය පහසුකම්: විශේෂයෙන්ම දැඩි හානියට පත්, ඉස්සන් සහ විසිතුරු මසුන් වැනි අපනයන කර්මාන්තවල නිරත මධ්යම සහ මහා පරිමාණ ව්යාපාර (සැකසුම් මධ්යස්ථාන, අයිස් කර්මාන්තශාලා) යළි ගොඩනැගීම සඳහා, රාජ්ය බැංකු හරහා අඩු පොලී ණය යෝජනා ක්රම සඳහා යොමු කිරීමට අමාත්යාංශය කටයුතු කරයි..
ජාතික ජලජීවී වගා සංවර්ධන අධිකාරියේ සභාපති, කිත්සිරි ධර්මප්රිය මහතා, සුනාමියෙන් පසු මිරිදිය ධීවර කර්මාන්තයට සිදු වූ දැවැන්තම විනාශය මෙය බව පෙන්වා දුන්නේය. "ජලජීවී වගා ක්ෂේත්රයට පමණක් සිදු වූ මුළු හානිය රුපියල් කෝටි 585ක් ලෙස ඇස්තමේන්තු කර තිබෙනවා. එයින් රුපියල් කෝටි 340ක්ම විසිතුරු මසුන්, ඉස්සන් සහ මුහුදු කූඩැල්ලන් වැනි අපනයන ආදායම් ඉපයූ කර්මාන්තවලට සිදු වූ හානියයි. ඉතිරි රුපියල් කෝටි 240ක පාඩුව මිරිදිය ධීවර අංශයට සිදුවීම, රටේ ආහාර සුරක්ෂිතතාවට ද සෘජු බලපෑමක් එල්ල කර තිබෙනවා," යැයි ඒ මහතා සඳහන් කළේය.
සිදු වූ හානියේ තරම සහ ප්රතිචාර ක්රමවේදය පිළිබඳව අදහස් දැක්වූ ධීවර දෙපාර්තමේන්තුවේ අධ්යක්ෂ ජනරාල්, සුසන්ත කහවත්ත මහතා, "අප අදියර හතරක විධිමත් වැඩපිළිවෙළක් ක්රියාත්මක කරනවා. හානි අවම කිරීම, දත්ත එක්රැස් කිරීම සහ තක්සේරු කිරීමෙන් අනතුරුව, කෙටිකාලීන සහන ලබා දීම සහ කර්මාන්තය යළි ගොඩනැගීමේ දීර්ඝකාලීන සැලැස්මක් ක්රියාත්මක කිරීම ඊට ඇතුළත්. කරදිය අංශයේ පමණක්, යාත්රා 300කට අධික ප්රමාණයක් සම්පූර්ණයෙන්ම විනාශ වී, 400කට අධික ප්රමාණයක් අර්ධ වශයෙන් හානි වී ඇති බව මූලික දත්ත පෙන්වා දෙනවා," යැයි පැවසීය.
පංච පුද්ගල කමිටුවක් මගින් සියලුම හානි තක්සේරු වාර්තා මේ වන විටත් තහවුරු කරමින් සිටින බවත්, ආධාර බෙදාහැරීම විනිවිදභාවයකින් සහ කඩිනමින් සිදු කරන බවත් අමාත්යාංශ ලේකම් ආචාර්ය බී. කේ. කෝලිත කමල් ජිනදාස මහතා තහවුරු කළේය. මෙම අර්බුදය ජයගෙන, අනාගතය සඳහා වඩාත් ශක්තිමත් සහ ඔරොත්තු දීමේ හැකියාවෙන් යුතු ධීවර ක්ෂේත්රයක් ගොඩනැගීමට අමාත්යාංශය පූර්ණ වශයෙන් කැපවී සිටින බවද ඒ මහතා වැඩිදුරටත් පැවසීය.