සාවද්‍ය දත්ත නිවැරදි කර, නව ක්‍රමෝපායන් ඔස්සේ ඉදිරියට යාමට කටයුතු කරන ලෙස ජාතික ජලජීවී වගා සංවර්ධන අධිකාරියට නියෝජ්‍ය අමාත්‍ය රත්න ගමගේ මහතා නිලධාරීන්ට උපදෙස් දුන්නේය.
ජාතික ජලජීවී වගා සංවර්ධන අධිකාරියේ (NAQDA) කාර්යභාරය, රටේ සංවර්ධන ක්‍රියාදාමයට සක්‍රීයව දායක කර ගැනීමේ අරමුණින්, එහි ප්‍රගති සමාලෝචන රැස්වීමක්, නියෝජ්‍ය අමාත්‍යවරයාගේ ප්‍රධානත්වයෙන්, පසුගියදා (15) එම අධිකාරී පරිශ්‍රයේදී පැවැති අතර එහිදී ඒ මහතා මෙම උපදෙස් ලබා දුන්නේය.
මෙම අවස්ථාව සඳහා, ජාතික ජලජීවී වගා සංවර්ධන අධිකාරියේ සභාපති කිත්සිරි ධර්මප්‍රිය මහතා, අධ්‍යක්ෂ ජනරාල්, අධ්‍යක්ෂවරුන්, සහකාර අධ්‍යක්ෂවරුන්, කලාප භාර අධ්‍යක්ෂකවරුන් සහ දිවයින පුරා සේවයේ නියුතු ව්‍යාප්ති නිලධාරීන් සහභාගී විය.
රැස්වීමේදී, දිවයිනේ මිරිදිය මත්ස්‍ය නිෂ්පාදනය ඉහළ නැංවීමේ ක්‍රමවේදයන් පිළිබඳව නියෝජ්‍ය අමාත්‍යවරයා විසින් දීර්ඝ ලෙස කරුණු විමසන ලදී. පසුගිය කාලය තුළ, විශේෂයෙන්ම 2024 වර්ෂය දක්වා ලබාගෙන ඇති මත්ස්‍ය අස්වනු පිළිබඳ දත්තවල විශාල අඩුපාඩු සහ සාවද්‍යතාවයක් පවතින බව මෙහිදී අනාවරණය විය. නිසි අධීක්ෂණයකින් තොරව දත්ත ලබා දීම හේතු වූ බව නිලධාරීන් විසින් පිළිගන්නා ලදී.
මෙහිදී අදහස් දැක්වූ නියෝජ්‍ය අමාත්‍ය රත්න ගමගේ මහතා අවධාරණය කළේ, "අතීතයේ වූ වැරදි නිවැරදි කර ගනිමින්, රටේ ජනගහනයට සරිලන පරිදි මත්ස්‍ය නිෂ්පාදනය ඉහළ නැංවීම සඳහා, මෙතැන් සිට හෝ නිවැරදි දත්ත සහ නිවැරදි ක්‍රමවේදයන් භාවිතා කරමින්, ජලජීවී වගා සංවර්ධන අධිකාරිය සෘජු දායකත්වයක් ලබා දිය යුතු" බවයි.
ක්ෂේත්‍රයේදී තමන් මුහුණ දෙන ගැටලු රැසක් පිළිබඳව නිලධාරීන් විසින් නියෝජ්‍ය අමාත්‍යවරයා දැනුවත් කරන ලදී:
නීතිවිරෝධී ධීවර කර්මාන්තය: මාදැල්, ත්‍රිත්ව දැල්, තංගුස් දැල් වැනි නීතිවිරෝධී පන්න ක්‍රම භාවිතය හේතුවෙන්, ජලාශවලට මුදාහරිනු ලබන මත්ස්‍ය පැටවුන් නිසි වර්ධනයට පෙර අල්ලා ගැනීම බරපතල ගැටලුවකි. මෙම තත්ත්වයට පිළියමක් ලෙස, විශේෂ කාර්ය බලකාය සමඟ එක්ව සිදුකරන වැටලීම් තවදුරටත් ශක්තිමත් කළ යුතු බව යෝජනා විය.
වාරිමාර්ග දෙපාර්තමේන්තුව සමඟ සම්බන්ධීකරණය: වාරිමාර්ග දෙපාර්තමේන්තුව මගින් ඇතැම් වැව්වල ජල මට්ටම ක්ෂණිකව වෙනස් කිරීම මත්ස්‍ය නිෂ්පාදනයට අහිතකර ලෙස බලපායි. ඒ පිළිබඳව එම දෙපාර්තමේන්තුව සමඟ සාකච්ඡා කර, ස්ථාවර යාන්ත්‍රණයක් සකස් කළ යුතු බවට එකඟ විය.
ඇතැම් වැව් සඳහා ප්‍රමාණවත් ජල සැපයුමක් නොතිබීම සහ ඔරු ලියාපදිංචි නොකිරීම වැනි ගැටලු ද සාකච්ඡාවට බඳුන් විය. මහවැලි සහ වාරිමාර්ග දෙපාර්තමේන්තු වැනි ආයතන සමඟ නිසි සම්බන්ධීකරණයෙන් කටයුතු කිරීම තුළින් මෙම ගැටලු බොහොමයක් නිරාකරණය කරගත හැකි බව නිලධාරීහු පෙන්වා දුන්හ.
ධීවරයින්ට තම අස්වැන්න සඳහා නිසි මිලක් නොලැබෙන අවස්ථාවලදී, ධීවර සංස්ථාව සෘජුවම මැදිහත් වී සාධාරණ මිලක් ලබා දීමට කටයුතු කරන බවට නියෝජ්‍ය අමාත්‍යවරයා සහතික විය.
තවද, නිලධාරීන් මුහුණ දෙන ප්‍රවාහන අපහසුතා සඳහා විසඳුමක් ලෙස, විදේශ ආධාර යටතේ යතුරුපැදි සහ වාහන ලබා දීමේ වැඩපිළිවෙලක් දැනටමත් ආරම්භ කර ඇති බව නියෝජ්‍ය අමාත්‍යවරයා ප්‍රකාශ කළේය. නිලධාරීන්ගේ අනෙකුත් ගැටලු සඳහා ද විසඳුම් ලබා දෙමින්, ඔවුන්ගේ සක්‍රීය දායකත්වය ලබා ගැනීමට අමාත්‍යාංශය පූර්ණ සහයෝගය ලබා දෙන බවද ඒ මහතා වැඩිදුරටත් පැවසීය.