Mitsubishi ආයතනයේ අනුග්‍රාහකත්වයෙන් සහ ශ්‍රී ලංකාවේ යුනෙස්කෝ (UNESCO) ජාතික කොමිසමේ සංවිධානයෙන් සිදුකෙරුණු "Mitsubishi Asian Children's Enikki festa " චිත්‍ර දිනපොත් තරගාවලියේ ජයග්‍රහණය ලැබූ පාසල් දරුවන් වෙත සහතික පත් ප්‍රදානය කිරීමේ උළෙල ඊයේ (28) ශ්‍රී ලංකා යුනෙස්කෝ ජාතික කොමිසමේ සභාපති අග්‍රාමාත්‍ය ආචාර්ය හරිනි අමරසූරිය සහ ශ්‍රී ලංකාවේ ජපාන තානාපති ඉසොමාටා අකියෝ මහතාගේ ප්‍රධානත්වයෙන් අරලියගහ මන්දිරයේ දී පැවැත්විණි.
මෙම "Enikki Festa" තරගාවලිය ආසියානු දරුවන් තුළ විවිධ සංස්කෘතීන් කෙරෙහි සහකම්පනය ඇති කිරීම සහ දරුවන් තුළ නිර්මාණශීලිත්වය වර්ධනය කිරීම අරමුණු කරගනිමින් පැවත්වෙන අතර, මෙරට පැවති තරගාවලියෙන් ජයග්‍රහණය ලැබූ දරුවන් 300දෙනෙකු ඇගයීමට ලක් කිරීම මෙහි දී සිදු විය.
මෙම අවස්ථාවේ දී උත්සව සභාව ආමන්ත්‍රණය කරමින් අග්‍රාමාත්‍යවරිය, මෙම වැඩසටහන තුළ පරිකල්පනය, නිර්මාණශීලිත්වය සහ ජාතීන් අතර මිත්‍රත්වය පිළිබඳ සුවිශේෂී සැමරුමක් ගැබ් වී ඇති බවත් ඒ ඔස්සේ ශ්‍රී ලාංකේය වටිනාකම්, සම්ප්‍රදායන් සහ අපගේ දෛනික ජීවිතය ලෝකය සමඟ බෙදාගනිමින් දරුවන්ගේ නිර්මාණ ඔස්සේ රටේ අභිමානය ජාත්‍යන්තරය වෙත ගෙන යන බවත් ප්‍රකාශ කළා ය.
එමෙන්ම මෙරට අධ්‍යාපනයේ සහ තාක්ෂණික දියුණුවේ සිට විවිධ ක්ෂේත්‍රය ඔස්සේ රට සංවර්ධනය කිරීම වෙනුවෙන් ජපන් රජය මඟින් දක්වන සහයෝගය අග්‍රාමාත්‍යවරිගේ විශේෂ ඇගයීමට ලක්විය.
වැඩිදුරටත් අදහස් දක්වමින් අග්‍රාමාත්‍යවරිය,
" අපේ රජය අධ්‍යාපනයේ විශිෂ්ටත්වය වගේ ම නිර්මාණශීලිත්වය පෝෂණය කරන අධ්‍යාපන ක්‍රමයක් වෙනුවෙන් පූර්ණ වශයෙන් කැපවෙන බව මම කියන්න කැමතියි. අපේ අනාගත අධ්‍යාපන ප්‍රතිපත්ති තුළ කලාව, සංස්කෘතිය සහ වෘත්තීය කුසලතා සඳහා සමාන වැදගත්කමක් ලබා දෙන අතරම විද්‍යාව හා තාක්ෂණික දැනුමද ලබාදෙමින් සමස්ත සංවර්ධනය කෙරෙහි අවධානය යොමු කරනවා. අපේ දරුවන් සාර්ථක වෘත්තිකයන් ලෙස ගොඩනැගීම පමණක් නොවෙයි සමබර, නිර්මාණශීලී, සහකම්පනයෙන් යුතු පුරවැසියන් ලෙස සූදානම් කිරීම අපගේ අරමුණයි " යනුවෙන් ද මෙහි දී වැඩිදුරටත් ප්‍රකාශ කළාය.
උත්සව සභාව ඇමතූ ශ්‍රී ලංකාවේ ජපාන තානාපති ඉසොමාටා අකියෝ මහතා ජයග්‍රහණය ලැබූ දරුවන්ට සුබපතමින් මෙම තරගාවලිය වෙනුවෙන් ශ්‍රී ලංකාවේ යුනෙස්කෝ ජාතික කොමිසම සිදුකරන ලද කැපවීම අගය කරන ලද අතර, මෙම තරගාවලිය මගින් දරුවන්ට විවිධ රටවල සංස්කෘතික වටිනාකම් ඉගෙනීමට හැකි වීමේ වැදගත්කම පිළිබඳව ද සඳහන් කළේය.
මෙම උත්සව අවස්ථාව සඳහා අග්‍රාමාත්‍ය ලේකම් ප්‍රදීප් සපුතන්ත්‍රි, ශ්‍රී ලංකාවේ යුනිස්කෝ ජාතික කොමිසමේ මහ ලේකම් මහචාර්ය ප්‍රභාත් ජයසිංහ, ශ්‍රී ලංකාවේ යුනෙස්කෝ ජාතික කොමිසමේ නියෝජ්‍ය ලේකම් නාලක රත්නායක යන මහත්වරුන් ඇතුළුව ආරාධිත අමුත්තන්, දෙමාපියන් සහ පාසල් දරුවන් ඇතුලු පිරිසක් සම්බන්ධ විය.