ශ්රී ජයවර්ධනපුර කෝට්ටේ රාජමහා විහාරස්ථානයේ ශ්රී දළදා මහා පෙරහැර මංගල්යය - 2026 පැවැත්වීම පිළිබඳ මූලික සාකච්ඡාවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්රධානත්වයෙන් ජනාධිපති කාර්යාලයේදී අද (23) පෙරවරුවේ පැවැත්විණි.
මෙවර ඇසළ උත්සවය නිමිත්තෙන් 126 වන වරටත් සංවිධානය කරන කෝට්ටේ රාජමහා විහාරස්ථ ශ්රී දළදා මහා පෙරහැර සැප්තැම්බර් මස 12 වැනිදා රාත්රී 8 සිට වීථි සංචාරය කිරීමට කටයුතු යොදා ඇත.
කෝට්ටේ ශ්රී දළදා මහා පෙරහැර මංගල්යය උත්කර්ෂවත්ව සහ අභිමානවත් අන්දමින් පැවැත්වීම සඳහා අනුග්රහය ලබා ගැනීම පිළිබඳව සහ ඊට අදාළ පෙර සූදානම සම්බන්ධව මෙහි දී සාකච්ඡා විය.
පෙරහැර මංගල්යය සාර්ථක කර ගැනිම වෙනුවෙන් අනුග්රහය දක්වන සියලුම රාජ්ය ආයතන සහ මූල්යමය අනුග්රහය දක්වන රාජ්ය සහ පෞද්ගලික ආයතන විසින් ඊට ලබා දෙන දායකත්වය සම්බන්ධව ද මෙහි දී සාකච්ඡා කෙරිණි.
ශ්රී ජයවර්ධනපුර කෝට්ටේ රාජමහා විහාරාධිපති ශ්රී කළ්යාණි සාමශ්රි ධර්ම මහා සංඝ සභාවේ උපනාම ලේඛකාධිකාරි ආචාර්ය අලුත්නුවර අනුරුද්ධ නායක මාහිමි, ශ්රී ජයවර්ධනපුර කෝට්ටේ ප්රාදේශීය ලේකම් කාර්යාලයේ බෞද්ධ කටයුතු සමායෝජක පූජ්ය ඌරුගමුවේ ධම්මදස්සි හිමි, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, ආරක්ෂක අමාත්යාංශයේ අතිරේක ලේකම් හර්ෂ විතානආරච්චි, කෝට්ටේ නගරාධිපති අරෝෂ අතපත්තු, මහරගම නගර සභාවේ සභාපති සමන් සමරකෝන්, ශ්රී ජයවර්ධනපුර කෝට්ටේ ප්රාදේශීය ලේකම් කසුන් ඈපා සෙනෙවිරත්න යන මහත්වරු, රාජ්ය ආයතනවල නිලධාරීහු, අනුග්රාහක සමාගම්වල නිලධාරීහු, ආරක්ෂක අංශවල ජ්යෙෂ්ඨ නිලධාරීහු ඇතුළු පිරිසක් මෙම අවස්ථාවට එක්ව සිටියහ.